_______________________________________
اتضح أنهم مجموعة من البلطجية وأصحاب السوابق والجرائم المتخصصة فى النهب والسرقة واختلاس الأموال وآخرها اختلاس الأوراق ومستندات الترشيح وخطفها من المرشحين والتنكيل والتعذيب لهم ولذويهم وتفتيش منازلهم ومنازل كل من يرشح نفسه فى الانتخابات المحلية وليس هذا هو كل شئ . ولكن الأعجب وأغرب الأمور هو موافقة القضاةعلى هذه الأمور بل ـ وليس السلبية وحسب ـ وإنما عدم قبول وامتناع رؤساء المحاكم والتنبيه بعدم تنفيذ الإجراء القانونى الذى هو حق أصيل لكل مواطن مصرى كفله له القانون والدستور... ألا وهوتسليم أوراق ومستندات الترشيح بطريق (انذار على يد محضر) كطريق قانونى بعد هروب المستشارين واللجان المعدة لاستلام أوراق الترشيح من المرشحين ... وكل الذى حدث ويحدث حتى الآن هو مسرحية هزلية ... أبطالها وللأسف المستشارون المفترض أنهم رؤساء لجان استلام مستندات الترشيح وهروبهم أو رفضهم لاستلامها وحتى فى بعض الأماكن لاتوجد لجان من أصله ومحاصرة كل الشوارع ومراكز استلام المستندات وأوراق الترشيح ومن قبل ذلك عدم السماح باستخراج البطاقات الحمراء وعدم استخراج الفيش والتنبيه بذلك على كل أقسام الجمهورية ومراكز الشرطة ومن يتفدم لاستخراج المستندات يتم القبض عليه واعتقاله ... وكل من قام بتسليم ورقه ومستنداته أخبروه بأنه قد تم تقطيعها واتلافها واعتبار كل شئ كأن لم يكن ...
هذا مايحدث ياسادة فى دولة طالما تشدق رئيسها وحكوماته بحرية الرأى والديمقراطية ودولة المؤسسات والقانون والدستور !!!!!!
____________________________________________
________________________________________
_ووعدَ الريس متقال بانتخابات محليّه
فى الجرايد وكمان فى قرار جمهوريّه
مفيش داعى أنا واعى للكلام ومتحضّر
مش ح اقول كتيرومش خايف أوح اعبّر
كفايه اللى شفته وانا هناك محتاروبادوّر
على واحد من اللجنه بس يبان أو يظهر
ياخد الورق منى ويثبتنى فى المحضر
وكمان قاضينا هربان ومتخفى متستر
دا حقيقى اللى بحصل والا احنا بنهذر
هى الحكومة خلاص بالشعب تستهتر
الحقيقه انه كذّاب منافق وشيخ منصر
وفاكرها دايمه ولابنه بيرتب وبيفكر
يورثها وملكيتها تبقى خالصة لو يقدر
حلم الطغاةغيره اللى فضل كان أشطر
بلد الاحرارمش ممكن فى يوم ح تتغير
البركان بيثور ويغلى فى لحظة وبيدمر
وكل ظالم نهايته سودة وياريته يستعبر
____________________________________________
سمعناه بيخطب بصوت عالى دولتنا دولة مؤسسات وحريّه
صدقت قلت اروح واشوف أصل الكلام لما يفتحوا الباب ليّه
دخلت المكان اللى قالوا ليّه قدّم فيه ورقك واثبت الشخصيّه
دورت فيه على القاضى وكل ماأسأل واحد يقول لسّه شويّه
قعدت استنى وعندى أمل إن الخطب تقصدنى أنا وانت وهيّه
قالوا لى إن القاضى وصل بس هومع المأمور بيرتب العمليّه
قلت من أولها النظام عاوز الانضباط يحكم كل الأمور... ليّه
الأمر طال قلت اشوف واحد بياع من بتوع الفول مع الطعميّه
رحت ادور لقيت واحد ولما شافنى بص لى والورق فى ايديّه
ضحك وقال تقعد والا مستعجل على الماشى وتلحق الجمعيّه
رديت وقلت فعلا أيوه مستعجل بس انا مش رايح الجمعيّه
قال طلبك فول بزيت مع الخضارومخلل بالنص مع طعميّة
قلت له تمام بس اتوصى وكتر الحراق وكتر الملح شويّه
قال لى استريح لما اجهز طلبك واستنى مع الباقيين شويّه
بصيت لقيت المكان مليان وكله معاه اللى يثبت الشخصيّه
انا مش لوحدى اللى صدق كلام وخطبة الراجل فى الجمعيّة
يومها المجلسين كانو متجمعين وبيصقفوا ..وبيهتفوا شويّه
قلت طبعا اللى ح يحصل ويكون ح يسرى على الجميع وعليّه
دفعت الحساب وكان ضعفين وأخدت الأكل ورجعت للمحليّه
فتحت الكيس وورقة ملفوف بيها سندوتش الفول والطعميّه
أكلت الفول لقيته بيقرقش زىالقزاز بلعته قلت يمكن التقليّه
فجأه لقيت مسمارمسلح خرم صدغى وبقيته مقطوم بالطعميّه
خلعته ورميته وفضلت امضغ وأقرقش وأقول ياسلام للتقليّّه
فجأه ضرسى انكسر تحت الزلط لهوه كان سبب القرقشه ديّه
حمدت ربى وشكرته بعد الأكل بس ناقص أكملها شوية ميّه
بصيت لقيت دورة شكلها نضيف دخلتها دورت على حنفيّه
فتحتها ومديت بوزى عشان اشرب ومن كفى شربت الميّه
لقيت الميه ريحتها زى جيفة حمار ميت ومرمىفىالجنابيّه
قلت الحمارالجيفه ارحم م اللى شميته فسبت من ايدىالميّه
وخرجت واناعطشان بس العطش أرحم من العدوى بملاريه
لقيت واحد قابلنى سألته عن مكان القاضى واللجنةالانتخابيّه
ضحك وقهقه وقال ياابن بلدىانت بتصدق كلام الجورنالجيّه
قلت له عندك ده كلام ريس وقاله أمام الشعب فى الجمعيّه
فقال بخاطرك يابويا انت الحر دا رأيك بشوقك وماتعطل فيّه
جاجه غريبه كانت بتحصل وانا موجود ورايح جاى كل شويّه
تلاته ماشيين ورايا وفى كل مكان يتابعوا ويسمعوا الملاغيّه
قلت ماتسأل ولاتهتم وأنا مواطن نضيف ومفيش بطحه عليّه
أخيرا وقفنى واحد منهم وقال انت مين ورايح جاى فى البلديّه
قلت أنا مواطن وجاى اقدم ورقى وترشيحى للمجالس الشعبيّه
قال لى روح بلدكم ونام وسط عيالك وهددنى بدل مايحبس فيّه
بصيت لقيت باروده ف جنبه ففهمت إنه من إخوانا البعدا ليّه
طقت فى نافوخى وقلت انا لازم أقدم ورقى وأثبت الشخصيّه
قلت يبقى الحل هوه إنى أروح وابعت الورق بطريقه قضائيّه
رحت على المحكمه وسألت قالوا من هنا فى القاعه الأولانيّه
أنا رحت على القاضى اللى بيحكم ولقيت الحاجب بنادى عليّه
ياراجل انت رايح فين وفين ورقك وإثباتك وجاى لأنهو قضيّه
أنا رديت وقلت جاى للقاضى معاياالورق وح أثبت الشخصيّة
قال ياراجل انت فاكرانك فىالبلد ورايح تقابل جارك ابن عطيّه
أخد الورق وقال انت عاوز إيه بالظبط وانت جاى لأنهوقضيّه
ياحاجب دا انت فاهم غلط أنا جاى اقدم وارشح نفسى للمحليّه
ضحك وصهلل وقال هناك تروح تقدم ورقك فى لجنة البلديّه
هنا قضايا وجنح ومشاكل ينظرهاالقضا ويحكم فيها بعد شويّه
أنا قصدى إنى أبعت ورقى مع القاضى واثبت حقى واللى ليّه
فهم قصدى وقال ناصح وفاهم وقال لىاعرض رسوم المحليّة
على المُحضِر وقله عاوز أعرض وأبعت الإنذار للجنة المحليّه
هناك علىيمينك تلاقى المُحضِر سلمه ورقك يوضب لك العمليّه
يامحضر اعمل لى انذار عرض خد الرسوم والورق واثبت ليّه
إنى حضرت وكنت جاهز ومعايه اللى يثبت مع الرسوم للبلديّه
بص وقال حقك ولكن عندى الأوامر شديدة تمنعنى من التلبيّه
أنا انصدمت آخر قلاع الحق انهار وأنا فاكره متين حصين ليّه
لسه ايه يابلد بعد كذب الحكومة والقيادة على جمهور المحليّه
صاحبنا فاكر إنه مستنى وخايف ياخدها حدغيره اصلها وسيّه
برطعوا فيها من زمن ولا حد قال لحدعندك انت مع الحراميّه
مصربتتحمل وتصبر بس آخرتها بيهبوا وياخدوا حقهم وشويّه
لوكانت لغيرك بقت ماكانتش وصلت ليك ولا كنت تتفرعن عليّه
انت فى التوهان وناسى إن لك رب هو العظيم القادرالمنتقم ليّه
وقادريقطع نفس كل اللى يطغى وينتقم ويخسف بيه كل أرضيّه
اللى قبلك كان فاكر نفسه للعيله كبير وكان أصل غروره نفسيّه
وفى لمح البصروهو متحصن بقوته كان وسط الدمارجته مرميّه
اوعى غرورك وطغيانك تفتكر يوم إنه ح يحميك من دعوة لوليّه
حبست ابنها واخوها أو جوزها وابوها ورميتهم فى المعتقل غيّه
الظلم لعنه بتلاحق وح تطارد ولاد ولادكم حتى لوطال الزمن بيّه
وحق كل اللى انظلم ح يرجع هنا فى الدنيا أو فىالآخره له هديّه
وربنا قال عبدى اللى انظلم أنا حانصرك ولوكان حينه بعد شويّه
ويومها ح تنادى ياظالم وتصرخ يارب رجعنى أو حتىجرعة ميّه
والمؤمن اللى انظلم يرد يومها عليك وهو بيتنعم ويتهنى بحوريّه
ربك عليك بتحريمها حكم وانت اعتبرت الدين لعبه وفاكرإنه تلهيّه
يومهاح ينساك زى مانسيته وجحدت آياته فى الدنيا وعنيك مغميّه
هورضاه يتوزن أو نساوى بيه كل اللى نملك أو كان من الدنيا ديّه
سبحانه هوالحكم العدل وعذاب الدنيا كله يهون وذاته عنى مرضيّه
هناك تعليق واحد:
على فكرة انتخابات المحليات خلاص خلصت
إرسال تعليق